Umuna a paset ti Tour of Luzon, naisayangkat iti Ilocos Norte

Published on: April 25, 2025by Irene Ringor, PGIN-CMO

Nangrugin ti “Tour of Luzon 2025” a nagbinnuligan ti Metro Pacific Tollways Corporation (MPTC) ken Duckworld PH.


Nagatiddog ti umuna a bansada iti 170 a kilometro a nangrugi iti ili ti Paoay a nagturong iti ili ti Pagudpud, nagsubli ken nagleppas met laeng iti ili ti Paoay babaen iti maawagan a “road cycling discipline.”


Nabara a pinasangbay ni Gob. Matthew Marcos Manotoc iti sangapulo ket pito a team pakairamanan dagiti nagkakammayet a grupo a nangbiag ti nasao nga aktibidad.


Nagyaman pay ti Gobernador kenni Philippine Olympic Committee President Abraham Tolentino, ken agdama pay a mangidadaulo iti PhilCycling, iti panangimatangna iti naisayangkat nga “opening ceremony” iti sango ti St. Agustine Paoay Church.


Impannakkel ti Gobernador a nupay adayo ti Ilocos Norte ket awan ti pagbabawian ti asino man nga umay pumasiar ditoy probinsia.


Malaksid kadagiti napipintas a lugar, impannakkelni Gob. Marcos Manotoc a paset iti sirmata ti probinsia a mayestablisar nga “eco-tourism site,” impalgakna a mabigbig ti Ilocos Norte kadagiti agkakaimas a taraon kas iti empanada, longganisa, pinakbet pizza, ken naruay a sabsabali pay.


Kagiddan daytoy, impadanonna ti panangnamnamana nga ininuten a matuntun-uyan ti arapaapna a pannakapagbalin ti Ilocos Norte a “Sports Tourism Hub” iti amianan a paset ti pagilian.


Inlawlawagna a kabayatan ti kangitingitan ti COVID-19 pandemic, insayangkat ti Talk n Text ken Meralco Boltz ti “training bubble” da ditoy probinsia ken nagbalin pay ti Paoay Lake a nangisayangkatan ti National Dragon Boat Team iti panagsanayda.


Kabayatanna, kinablaawan ni Gob. Marcos Manotoc ti MVP Group iti panangidaulo ti MPTC ken ti Duckworld PH iti naimballigian a panangbiagda iti Tour of Luzon a nairubuat idi tawen 1954.


Innayonna a pakaidayawan ti Ilocos Norte ti kaadda ti pasetna iti daytoy a pannakaisubli daytoy nga aktibidad.


Maisayangkat ti maikadua a paset ti Tour of Luzon a mangrugi iti ili ti Paoay ken agpatingga idiay siudad ti Vigan nga agatiddog ti 80 a kilometro.