PGIN, nangipaay ti tulong kadagiti mannalon ti probinsia  

Nasurok 28 milion a pisos ti inpaay ti gobierno probinsial a tulong kadagiti mannalon, mangngalap ken dagiti livestock raiser ditoy Ilocos Norte.

Segun kenni Engr. Maria Teresa Bacnat, mangidadaulo ti Provincial Agriculture Office (PAO) a daytoy ket babaen iti programa nga “Agri Ka Dito”a proyekto ti PAO, Sustainable Development Center (SDC) ken ti Provincial Veterinary Office (PVET) kas paset ti napinget a kalikagum ni Gob. Matthew J. Marcos Manotoc nga alisto a pannakaipaay ti tulong kadagiti mannalon ditoy probinsia. 

Imbatadna a dagiti nakiddaw ti Agri Ka Dito ket agdagup ti maysa a milion uppat a gasut duapulo ket uppat a ribu pito gasut limapulo a pisos (Php 1,420,750.00).

Inbunannagna a 159 a mannalon manipud iti siudad ti Laoag ti benepisiario a naipaayan ti abono nga organic ken inorganic, foliar fertilizer, humus, jetmatic pump, knapsack sprayer, plastic drum, irrigation hose, pestisidio ken bin-i ti nadumaduma a bukbukel ti natnateng.

Impalgakna a sabali pay dagiti 23 a livestock raiser a naapektaran dagiti tarakenda a baboy ti ASF ditoy siudad ti Laoag ti naipaayan ti saggaysa (1) a kalding ken veterinary medicines kas iti bitamina ken pagpurga.

Kunana nga adda pay ti maipaay kadagitoy a “forage chopper”, plastic drum ken maysa nga “egg incubator.”

Segun kenni Engr. Bacnat, 38 a gunglo dagiti mannalon kas kadagiti agmulmula ti natnateng, agmulmula ti tabako ken livestock raiser ti nabenipisiaran iti naibunong a lima (5) a combine harvester, innem (6) a four-wheel tractor, lima (5) a multi-cultivator ken 11 a hand tractor nga agbalor iti Php 26,905,000.00. 

Imbatadna nga agdagup iti tallo gasut pitopulo ket siam a ribu ken limapulo a pisos ti maipaay a tilapia fingerlings ken fishnet kadagiti walopulo a mangngalap ditoy siudad ti Laoag. 

Malaksid iti daytoy, adda pay ti naibunong a rehab inputs para kadagiti agmulmula ti mangga ken High Value Crops (HVC)  a naapektaran ti bagyo a Neneng iti nadumaduma nga ili ken siudad ditoy probinsia.

Inlawlawagna a maibilang ditoy ti nadumaduma a klase ti abono ken foliar fertilizer a pinundoan ti Departamento ti Agrikultura nga ibunong ti gobierno probinsial babaen iti PAO.