PGIN, nangipaay ti nasursuruk ngem 4M a pisos, tulong kadagiti mannalon ken mangngalap ti siudad ti Laoag

Nasursuruk ngem 4M a pisos ti naipaay a tulong kadagiti mannalon ken mangngalap ditoy siudad ti Laoag.

Indauloan a mismo ni Gob. Matthew Marcos Manotoc ti pannakaipaay dagiti nasao a tulong manipud iti gobierno probinsial babaen iti Sustainable Development Center ken ti Provincial Agriculture Office.

Segun ken ni Mrs. Luz Ortal, mangidadaulo ti SDC, agdagup ti nakurkurang ngem tallo a milyon a pisos dagiti naipaay a tulong iti Agri Ka Dito program a napundoan manipud iti RA 7171.

Inlawlawagna a walo gasut ket dua a mannalon ken mangngalap dagiti nabenipisiaran iti nasao a programa.

Imbatadna a karaman kadagiti naipaay dagiti nadumaduma a klase ti abono pakairamanan dagiti babassit a kagamitan iti panagtalon.

Kabayatanna, inpakaammo ni Ortal a nasursuruk ngem maysa a milyon a pisos ti dagup dagiti naipaay iti babaen ti Soil Restoration Program a napundoan manipud iti “5 percent Local Disaster Risk Reduction and Management Fund ken iti RA 7171.

Inbunannagna a tallopulo ket lima a kameng ti 55-A Barit Farmers Association ti Brgy. Barit ditoy siudad ti Laoag ti nabenipisiaran.

Innayonna a karaman kadagti naipaay ti sangaribu a sako ti organic fertilizer, sanga gasut uppat a pulo a sako ti inorganic fertilizer,  sanga ribu a supot ti soil conditioner wenno humus, maysa a unit ti brush cutter ken pito a knapsack sprayer.