PGIN, mangipaay ti nasurok maysa a milion a pisos kadagiti awardees ti Sirib Awards

Nasursurok ngem maysa a milyon a pisos ti insentibo nga ipaay ti Provincial Government of Ilocos Norte (PGIN) kadagiti “awardees” iti “Sirib Awards 2025.”

Segun kenni Mr. Willie Jake Sib-at, Ilocos Norte Youth Development Officer ken Officer-in-charge ti Provincial Education Office, agdagup ti P 1,191,000.00 ti maipaay nga insentibo kadagiti maseknan nga “awardees” intuno May 2.

Imbatadna a maisayangkat ti nadakamat nga aktibidad iti Municipal Public Auditorium iti ili ti Vintar.

Inlawlawagna a maipaayan dagiti “International Individual Awardees” manipod P 4,000.00 inggana P 8,000.00, depende iti nagun-od dagitoy a pammadayaw.

Imbatadna nga umawat met iti P 10,000.00 inggana P 15,000.00 dagiti “International Group Awardees.”

Inbunannagna a dagiti “National Individual Awardees” ket maipaayan iti P 3,000.00 inggana P 5,000.00, idinto a dagiti “National Group Awardees” ket makaawat ti P 4,000.00 inggana P 8,000.00.

Naammoan a dagiti nangiyalat ti “special awards” iti international ket makaawat iti P 8,000.00 ken P 5,000.00 met iti “National Special Awardees.”

Kabayatanna, inpakaammona a dagiti “topnotchers” manipud rank 2 agingga iti rank 10 ket umawat ti P 10,000.00 iti tunggal maysa. 

Naammoan a 40 iti “international individual,” 25 dagiti “international group,” 75 iti “national individual,” 34 iti “national group,” innem (6) iti “international special awards,” dua iti “national special awards” ken pito (7) a “topnotcher.”