Kadiwa market on wheels, maisayangkat intono biernes ditoy Ilocos Norte

Maisayangkat ti Kadiwa Market on Wheels iti masungad nga Abril 28 aldaw ti biernes iti compound ti Provincial Agriculture Office.

Segun ken ni Engr. Maria Teresa Bacnat, OIC Provincial Agriculturist, kiniddaw ni Gob. Matthew Marcos Manotoc iti Department of Agriculture regional office a maisayangkat iti nasao nga aktibidad ditoy probinsia.

Mainaig iti daytoy, inpakaammona a ditoy a mailako dagiti kangrunaan a magatgatang iti nalaka a presyo.

Imbatadna nga inawis pay ti DA regional office ti maysa a kooperatiba nga aglako iti bagas pakairamanan dagiti mannalon ditoy probinsia a mangilako kadagiti produktoda.

Inlawlawag ni Bacnat a paset daytoy iti kalikagum ti DA a mangtulong kadagiti mannalon ken kooperatiba ditoy probinsia a makailako kadagiti produktoda.

Kunana a naawis pay dagiti mangngalap idiay Pangasinan nga umay mangilako kadagiti produktoda.

Innayonna a daytoy ket kas tulong kadagiti kakailian ditoy probinsia tapno makagatangda iti nalaklaka a presyo ti bangus ken tulong metten kadagiti taga Pangasinan tapno saanda a marigatan a mangilako kadagiti produktoda.